Клуб янгиликлари

Шота Арвеладзе: "Тўлиқ устунлик билан ғалаба қозондик"

Клуб янгиликлари

"Пахтакор" бош мураббийи "Сурхон" билан учрашувдан кейинги матбуот анжумани ўйин ҳақида фикрларини билдирди.

- Бугун ўйинни тўлиқ назорат қилдик. Жуда кўплаб вазиятларга эга бўлдик. Анчагина тез ва чиройли футбол намойиш қила олдик. Аввалги ҳолатга қайтиб боряпмиз деб ўйлайман. Рақиб эса дастлабки дақиқалардан чуқур ҳимояланишга ўтди. 20 дақиқа ичида энг камида бир гол уришга муносиб ўйин кўрсатдик. Бироқ кейин пенальтидан гол ўтказиб юбордик. Шунга қарамай, биринчи бўлимнинг ўзида икки чиройли тўп киритган ҳолда олдинга чиқдик. Бундай пайтда ўйиннинг бориши тўғрисида йигитларга кўрсатма бериш, ўйинга тузатиш киритиш осонроқ. Иккинчи бўлимда ҳам устунликни давом эттирдик. Рақиб таркибида ҳужумкор ўйинга мослашган футболчилар сони кўп, аммо улар ҳаддан ташқари ҳимоявий ўйин намойиш қилишади. Улар биз кутгандек ҳимояда ўйнаб, стандарт ҳолатлар ва қарши ҳужумлардан фойдаланишга уринишди.

Биз учта гол урган ўйинимиздан ҳам кўнгли тўлмаётганлар борлиги жуда яхши. Бу биз учун ижобий жиҳат. Футболда ҳар бир вазиятдан фойдаланишнинг имкони йўқ. Лекин учта гол ҳам камдек кўринар экан, демак, биздан кўпроқ нарса кутишмоқда. Жамоа учун буни жуда яхши дея оламан.