Эндиликда жамоамизнинг собиқ футболчисига айланган Холматов ҳамадонликлар билан 2 йиллик шартномага имзо чекди. Кеча барча масалалар тўлиқ ҳал этилди ва Акмалнинг "Пас"га кўчиб ўтиши ойдинлашди. Янги клуби таркибида бир неча машғулотларда иштирок этишга улгурган Холматов бугун жамоа мавсумолди тайёргарлик жараёнини ўтказаётган Голландияга йўл олди. "Пас"нинг асосий таркиби бир неча кун олдин айнан "лолалар ўлкаси"га учиб кетганди. Ҳамадонликлар сафида у саккизинчи рақамли либосда ҳаракат қилади. Дастлаб ярим ҳимоячига еттинчи рақамни топширишганди, лекин кейинчалик Акмалнинг бутун фаолиятини саккизинчи рақамда ўтказганидан хабар топган "Пас" раҳбарияти унга севимли рақамини тақдим этишди. Клуб раҳбариятининг таъкидлашича, ўзаги ёш футболчилардан иборат "Пас"да Холматов ўзининг бой тажрибаси билан етакчиликни қўлга олади.

Биз "Пахтакор" футбол клуби ва жамоамиз ишқибозлари номидан Холматовга Эрондаги фаолияти омадли чиқишини тилаб қоламиз.