Афсуски, юз берган фожеа уни орамиздан олиб кетди. Шунга қарамай, Красницкийнинг намойиш этган ажойиб ўйинлари ушбу футболчининг афсоналар қаторидан жой олишига, ишқибозлар қалбида бир умрга сақланиб қолинишига имкон яратди.

Бугун эрта тонгдан Красницкий дафн этилган "Боткин" қабристонида Наримон Жалолов бошчилигидаги футбол фахрийлари, ЎФФ ва ПФЛ ходимлари, "Пахтакор" ФК вакиллари ва ишқибозлар ҳозир бўлишди. Улар марҳум футболчини эслаб, у билан боғлиқ турли хотираларни ёдга олишди. Қабрга гуллар қўйиш жараёнида барча Ўзбекистоннинг ХХ асрдаги энг кучли футболчини ёдга олди.

"Пахтакор"да 1958 йилдан 1971 йилгача ўйнаган Геннадий Красницкий шу мавсумлар мобайнида клуб учун 400дан ортиқ учрашувларда майдонга тушди ва 200дан ортиқ голларга муаллифлик қилди. 1969 йилнинг сентябрь ойида жамоадаги юзинчи голини урган биринчи ўйинчига айланди ва Григорий Федотов тўпурарлар клубига аъзо бўлди. Собиқ Иттифоқ чемпионатлари тарихида рақиблар дарвозасини 122 бор аниқ нишонга олган.

Футболчилик фаолиятини якунлагач, у "Пахтакор", "Трактор", "Янгиер" ва "Звезда" жамоаларида мураббий сифатида фаолият юритди. Кейин эса ҳакамлар назоратчиси лавозимида ишга киришди.

1988 йилнинг июнь ойида тарқалган совуқ хабар барчани тушкунликка тушириб қўйди. Унда спорт устаси Геннадий Александрович Красницкийнинг ҳалок бўлгани эълон қилинганди...

ПФЛ эндиликда юзтадан ортиқ тўп киритган футболчиларни Геннадий Красницкий тўпурарлар клубига аъзо қилиш ҳақидаги таклифни қабул қилди. Яқин кунларда эса таниқли футбол журналисти Владимир Сафаровнинг Красницкий ҳақидаги навбатдаги китоби нашрдан чиқади.
Ушбу афсонавий ва буюк футболчининг хотираси ҳеч қачон қалбимиздан ўчмайди. "Пахтакор"га содиқ бўлган ва клубни ҳеч қачон ташлаб кетмаган Красницкийни доимо ёдга оламиз!