Жорий мавсумдан эътиборан "шер"лар ишқибозлари ҳар ойнинг энг яхши футболчисини аниқлаб боришга қарор қилдилар. Февраль ойида "Ал Айн" қаршилигини синдира олган пахтакорчилар орасида Одил Аҳмедов намойиш этган ўйин барча ишқибозларга бирдек манзур бўлди. Натижада жамоамиз сардори "ойнинг энг яхши" футболчиси номинацияси ғолиби бўлди. 

Шу муносабат билан, бугун фан клубнинг бир гурух ишқибозлари "Пахтакор"нинг Қибрайдаги машғулот базасида бўлиб, футболчига ўзларинг эсдалик совғаларини топширдилар. Леаонинг кичик нусхаси акс этган шерчага эга чиққан Одил мухлисларга ўз миннатдорчилигини билдирди.

- Февраль ойи нафақат мен учун, балки жамоамизга омадли келди. ОЧЛда ғалаба билан старт олишимиз келгуси ўйинларимизда бизга рухий ёрдам бўлишини хис қилардик. Умуман олганда "Ал Айн"га қарши баҳсда жамоамизнинг барча аъзолари бирдек муносиб улуш қўшдилар. Навбатдаги ўйинларда ҳам ишончингизни оқлашга ҳаракат қиламиз.