Айтиб ўтиш жоизки, футболчи 1979 йил мудхиш авиаҳалокатга учраган "Пахтакор-79" жамоаси таркибида ҳам маълум муддат тўп сурган кам сонли ўйинчилардан бири эди. Клуб билан кўплаб муваффаққиятларга эришган ҳимоячи, 1982 йил чемпионатни олтинчи ўринда якунлаган, А.Якубик жамоадан кетган сардор сифатида шерикларини майдонга бошлаб тушганди. Бу вазифани етти йил бажарган Гена руҳий жиҳатдан ўзини ўнглаб, машғулотларда тиним билмай ишлади. Натижада жамоанинг тўпурарларидан бирига айланди. Рақиб дарвозасига жарима тўплари белгиланганда мухлислар биргаликда "Гена! Гена!..." деб бақиришарди.
Футболчи бўлиб етишида онасининг хизмати беқиёс бўлганлиги кўп бор таъкидлайдиган Денисов, ўша вақтда спорт мактабига уни етаклаб боргани учун волидасидан бутун умр миннатдор! Генанинг биринчи мураббийи "пахтакорчи" Виктор Науменко ҳисобланади. 1977 йил Ўзбекистоннинг биринчи рақамли жамоаси сафида қўшилган Денисов дастлаб ўринбосар таркибида тўп тепиб юрди. Футболчи "Пахтакор"нинг яққол рекордчисидир. Ҳарбий хизматга чақирлган  ҳимоячи Москванинг ЦСКА клуби таркибида 19 учрашувда майдонга тушган. Бундан ташқари, Владикавказнинг "Спартак" жамоаси либосини ҳам кийиб, Россия чемпионатининг кумуш медаль соҳибига айланган. Футболчи фаолиятини "Навбаҳор"да якунлади. Наманганликлар таркибида икки марта учинчи ўрин, бир марта мамлакат чемпиони деган шарафли номга эга бўлди.
Футболчи биргина чемпионат ўйинларида 508 учрашувда майдонга тушишга улгурган. Маълум муддат, "Сергили", "Чирчиқ", "Пахтакор" ва "Локомотив" клубларида мураббий бўлиб ишлаган Денисовларнинг каттаси, кейинчалик ўзига муносиб иш топди. "Чиғатой"да болаларга футболнинг илк сир-асрорларини ўргатаётган Гена бундан фахрланади.