03-09-10
Янгиерда "Машъал" ўринбосарларини 21-турнинг олдинга сурилган учрашувида мағлуб этган футболчиларимиз чемпионлик учун яна бир қадам ташлашди.
Тенг курашлар остида кечган беллашувда ҳар икки жамоа бир неча марта тўп киритиш учун қулай имкониятларга эга бўлди. Мезбонлардан Шадрин, жамоамиздан эса Мирҳайдаров ва Фарҳод Тожиев вазиятлардан фойдалана олишмади. Биринчи тайм охирларида Никита Рибкин жарима майдонида рақиб ҳужумчисини тўхтатиб қолгани боис ҳакам уни майдондан четлатиб, пенальти белгилади. Ўн бир метрлик жаримани захирадан тушган Элдор Тожибоев ушлаб қолишга эришди.
Иккинчи таймда вазиятлар унчалик кўп содир бўлгани йўқ. Баҳс тугашига ўн дақиқача қолганда энди мезбонлар ўз жарима майдонларида қўполлик қилишди. Пенальтини Акрам Баҳриддинов аниқ амалга оширди. Шу тариқа пенальтилар "Пахтакор"га ғалаба келтирди. Бу ютуқдан кейин жамоамиз 48 очко тўплаб, "Нефтчи"дан икки ўйин кўп ўтказган ҳолда 12 очкога ўзиб кетди.
|
